La NOL l'è stada desvilupada per permeter a tuta la lombardofonia de scriver cont una grafia unega ma respetosa de la tradizzion storega de la lengua.
Una grafia comuna l'è vun di pass pussee important per salvà el lombard in d'un mond che el dovra la scritura 'me principal mez de comunicazzion. Compagn de ogni lengua, el lombard el gh'ha tante variant diatopiche e i so diferenze inn pussee marcade che quei di lengov oficiai, soratut per el fat che i gh'hann mai havud un standard. Una grafia unitaria a l'è, donca, necessaria per schivà una “Babel” di ortografie con soluzzion diverse, despess vœuna contra l'oltra e incoerente in tra de lore.
La grafia Nœuva Ortografia Lombarda la se fonda in su la tradizzion grafega lombarda. La bas de partenza inn i grafie tradizionai lombarde. De queste chì, la s'è desvilupada una grafia nœuva con trat marcad pussee polinomich, e s'inn ranzade e sostituide carateristiche superflue o minga necessarie. De sorapu la grafia NOL l'è una grafia che l'è fazzil de scriver cont i tastere del dì d'incœu.
La NOL a l'è una grafia che la se adata ai situazzion di parlant e che la da la possibilità de scriver in de l'istessa manera a tucc, ma anca in manera diversa se gh'è besogn de fàll in d'un determinad contest. Per quell motiv chì, la tendenza la sarà vers la flessibilità, senza sgiontà tut in d'una unega e monolitega koiné. La NOL la met minga un standard de gramatega: el "gat" el sarà semper, al plural, "gat" a Milan e "gacc" a Berghem.
I interessad poden lensger la storia de la grafia.
La grafia NOL l'è pensada propi per el lombard e tut i so dialet.
Ghe vœul poch per imprender la grafia NOL se se cognoss vun di dialet lombard.
Rispet al parlad la grafia NOL la cambia no tant, a diferenza de alter proposte grafeghe.