La storia de la NOL


El lavorà per desvilupà la NOL el scomincia formalment in del fevrer 2020 grazia al Jacom Dovigh (Jacopo F. Dovico) e al Peder Cociancich (Pietro Cociancich), grazzia anca al longh lavorà del Cociancich in del studi de un'evoluzzion de la grafia classega milanesa in sens pussee panlombard.

Intorna a fin setember 2020 l'è squasi fornida la definizzion di regole principai e i member del grup - intratant s'inn sgiontad el Luca Berrino, el Brian Sciretti e 'l Lissander Caval - deciden de vedèss de persona insema al padovan Samuele Segala el 2 de otober 2020 a Milan, in la zona de Lambrad, indova che riven a sistemà i darer detaj de la grafia e deciden de preparàss per relassàla al publegh, cont un sit internet, e deciden anca de andà inanz in la soa oeuvera de studi del lombard cont el fondà l'Academia Bonvesin de la Riva.